Bəqərə surəsi, 6-cı ayə

(Ya Rəsulum!) Həqiqətən, kafirləri əzabla qorxutsan da, qorxutmasan da, onlar üçün birdir, iman gətirməzlər.

Dünya ölkələrində cadugərlərə münasibət – BƏS BİZDƏ?

Share Button

Azərbaycanda niyə cadugərlər məsuliyyətə cəlb olunmur?!

“Falçılıq adı altında fəaliyyət göstərən şəxslərə qarşı hazırda Dövlət Komitəsi öz səlahiyyətləri çərçivəsində tədbirlər görür. Ümumilikdə bu sahədə vəziyyəti müəyyən etmək olduqca çətindir. Çünki bu qəbildən işbazların əməllərinə düçar olmuş şəxslər çox az hallarda bu əməlləri etiraf edir və aldadıldıqlarını bacardıqları qədər hər kəsdən gizlətməyə çalışırlar. Lakin bununla bağlı müraciət daxil olduqda aidiyyəti qurumlarla birlikdə müvafiq işlər aparılır”.

“Din.az” “azinforum.az”a istinadən xəbər verir ki, bunu Dini Qurumlarla İş üzrə Dövlət Komitəsinin İctimaiyyətlə Əlaqələr Şöbəsinin mətbuat katibi Bəhruz Müslümov bildirib.
Ancaq maraqlıdır ki, ölkənin müxtəlif rayon və şəhərlərində açıq ünvanda, tanınmış adla fəaliyyət göstərən kifayət qədər məşhur cadügər və baxıcılar var ki, onlara “gözün üstə qaşın var “ deyən belə yoxdur.

“Azinforum.az” saytı tərəfindən bu istiqamətdə bir neçə araşdırma mövzusu təqdim edilib. Araşdırmalardan bir neçəsi Şamaxı rayonunda cadügər və falçıların açıq fəaliyyətlə məşğul olması ilə bağlı mövzunu əhatə edib. Konkret şikayətlər əsasında hazırlanan həmin yazılarda Şamaxıda fəaliyyət göstərən məşhur cadugərlərin adı və ünvanına kimi göstərilib və həmin adamlarla bağlı sözügedən rayonun polis idarəsinə sorğu ilə də müraciət edilib. Keçmiş yazılarla bağlı edilən sorğularla bağlı polis idarəsindən bildiriblər ki, konkret şikayət olsa tədbir görə bilərlər. Maraqlıdır ki, Şamaxı cadugərləriylə bağlı təqdim edilən araşdırma ölkənin bir çox tanınmış KİV-ləri tərəfindən tirajlandıqdan sonra, yaranmış ajiotaj əlaqədar qurumları hərəkətə keçməyə vadar etdi və rayondakı cadugərlərin, baxıcıların əl-ayağı bir müddət yığışdırıldı.

Görünür, bu qadağa mövsümi xarakter daşıyırmış. Əldə edilən məlumata görə, Şamaxıdakı cadugərlərin ən üzdə sayılanı milliyyətçə rus olan Sveta yenidən iş başındadır. Hazırda onun qəbuluna düşmək üçün evinin qabağında uzun növbələr düzülür. “Biz Şamaxıda olarkən, şəhərin bir neçə yerində avtomobili saxlayıb, baxıcı Svetanın evini soruşduq. Gördük ki, onu tanımayan yoxdur. Burdan belə bir nəticə çıxır ki, əlaqədar qurumlar bu məsələdən xəbərsiz ola bilməzlər, sadəcə, nəyəsə görə Svetanın cadugərliyinə göz yumulur. Hətta bizdə olan məlumata görə, bəzi yüksək vəzifəli şəxslərin xanımları və ailə üzvləri belə qrup halında Svetanın qəbuluna gələrək, onun qara maqiyasından yararlanırlar. Svetanın özü isə, bir neçə nəfərə fəaliyyətində qanunsuz əməlin olmadığını deyib. Onun məntiqindən belə çıxır ki, bəxtə baxmaqda heç bir cinayət tərkibi ola bilməz. Hər halda, Svetanın özü və bəzi yerli qurumların nümayəndələri onun hansı növ zərərli fəaliyyətlə məşğul olduğunun fərqindədirlər”.

Azinforum.az bildirir ki, bu sahədə xarici ölkələrin müəyyən təcrübəsi var. Məsələn, Türkmənistanda ekstrasenslik və falçılıq bu ildən qadağan olub. Bu ölkədə hipnozla məşğul olanların, ekstrasenslərin, falçıların və fövqəltəbii gücləri vasitəsilə insanlara təsir etdiklərini iddia edənlərin xidmətlərindən istifadə də qadağalar çərçivəsindədir.

Tacikistanda bu yaxınlarda Cinayət Məcəlləsinə yeni dəyişiklik təsdiq edildi. Dəyişikliyə görə, əgər falçılar, cindarlar əvvəllər sadəcə müəyyən miqdarda cərimə edilirdilərsə, bundan sonra 7 ilə qədər müddətdə azadlıqdan məhrum ediləcəklər.

Anqlo-sakson hüququnun tətbiq edildiyi ölkələrdə aldadılan şəxs müvafiq qurumlara müraciət edir və fırıldıqçıya qarşı “fraud-dələduzluq” üzrə cinayət işi başlanılır, yaxud onların işinə məhkəmədə mülki qaydada baxılır.

Həmçinin Türkiyə Respublikasında xüsusilə geniş yayılmış “qəhvə falı” və digər fal növləri qadağan olunub və polis bununla bağlı mütəmadi olaraq reydlər aparır. Bu əməlləri törətmiş şəxslər ən yaxşı hallarda yüksək cərimələrlə xilas ola bilirlər.

ABŞ-ın bəzi ştatlarında falçılığın qadağan olunması ilə əlaqəli yerli və dövlət qanunları mövcuddur. Belə ki, bu qanunların bəziləri falçılıq termininin işlədilməməsini, bunun başqa terminlərlə ifadəsini (mənəvi dəstək, psixoloji yardım) tələb edir. Elə qanunlar da var ki, ümumiyyətlə, bu fəaliyyət növünü qadağan edir.

Yeni Zelandiyada da falçılıq cinayət hesab olunur və bu işlə məşğul olduğu aşkarlanan şəxs yüksək məbləğdə cərimə edilir.

Səudiyyə Ərəbistanında və bəzi müsəlman ölkələrində falçılıq qadağandır; bu əməl ölüm, yaxud ömürlük həbslə cəzalandırılır.

Qeyd edək ki, heç bir İlahi din falçılığı və cadugərliyi qəbul etmir, bütün dinlər falçılığı və cadugərliyi şeytan əməli hesab edir. Məsələn, yəhudilərin müqəddəs kitabı Tövratda “Gizli şeylər Allahımız Rəbbindir” (Təsniyə, 29/29) cümləsiylə qeyb bilgisinin Allaha aid olduğu və bundan uzaq olmağın vacibliyi bildirilmiş, “Aramızda falçı, münəccim, sehirbaz, ofsunçu, cindar, baxıcı, ölülərlə məsləhətləşən olmayacaq” (Təsniyə, 18/10-11) – deyilərək bunlar qadağan edilmiş, bu işlərlə məşğul olanların öldürülmələri əmr olunmuşdur (Levililər, 19/31; 20/6, 27).

Xristianlığın müqəddəs kitabı Əhdi-Cədiddə falçılıqla bağlı məlumatlar olduqca azdır. Buna baxmayaraq, Əhdi-Cədidin “Rəsulların işləri” bölməsində xristian olmayanlar arasında sehirbaz və falçılarla bağlı məlumatlar verilmiş, onların əməlləri tənqid edilmişdir.

İslam dininin müəqqdəs kitabı Qurani-Kərimin “Maidə” surəsinin 90-cı ayəsində qeyd edilib ki, “Ey iman gətirənlər! Şərab da (içki də), qumar da, bütlər də, fal oxları da Şeytan əməlindən olan murdar bir şeydir. Bunlardan çəkinin ki, bəlkə, nicat tapasınız!”.

Bütün dinlərin, xüsusilə də İslamın falçılıq və bu kimi fəaliyyətləri qadağan etməsinə baxmayaraq, təəssüf ki, günümüzdə falçılıq və ona inananlar hələ də qalmaqdadır. Azərbaycanın müxtəlif rayon və şəhərlərində Sveta kimi baxıcıların sayı isə heç də az deyil. Dinimizin qadağan etdiyi həmin fəaliyyətdən dövlətimizə belə zərrə qədər xeyir yoxdursa, belə əməllərin qarşısı niyə alınmır?

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir