Uca Allah Buyurur:

Onlara: «Allahın endirdiyinə tabe olun» deyilsə, «Xeyr! Biz atalarımızı hansı yolda görmüşüksə, ona tabe olacağıq!» deyirlər. Bəs ataları ağıllarını bir şeyə işlətməmiş və düz yola da daxil olmamışdılarsa, yenə tabe olacaqlar?

Bəqərə surəsi, 170

İlahiyyat İnstitutunda Beynəlxalq Ərəb Dili Gününə həsr olunmuş konfrans keçirilib

Azərbaycanın ali təhsil müəssisələrində ərəb dilinin tədrisi ilə bağlı mövcud vəziyyət və perspektivlər …

Azərbaycan İlahiyyat İnstitutunda (Aİİ) Beynəlxalq Ərəb Dili Gününə həsr olunmuş “Azərbaycanda ərəb dilinin tədrisi sahəsində mövcud vəziyyət və perspektivlər” mövzusunda konfrans keçirilib.

Din.az bildirir ki, Aİİ-dən Trend-ə verilən məlumata görə, tədbirdə Azərbaycanın ali təhsil müəssisələrində ərəb dilinin tədrisi ilə bağlı mövcud vəziyyət və perspektivlər müzakirə olunub.

Aİİ-nin rektoru Ceyhun Məmmədov qonaqları salamlayaraq, ölkəmizdə mövcud olan yüksək dini-mənəvi mühitdən danışıb. O, ulu öndər Heydər Əliyevin əsasını qoyduğu din siyasətinin Azərbaycan Respublikasının Prezidenti İlham Əliyev və Birinci vitse-prezident Mehriban xanım Əliyeva tərəfindən uğurla, ardıcıl və məqsədyönlü şəkildə davam etdirildiyini bildirib. Azərbaycan Respublikasının Prezidenti İlham Əliyevin müsəlman ölkələri və İslam Əməkdaşlıq Təşkilatı ilə əməkdaşlığa böyük önəm verdiyini vurğulayan rektor, ötən ilin ölkəmizdə “İslam həmrəyliyi ili” elan olunduğunu, milli-mənəvi dəyərlərin qorunmasına xüsusi önəm verildiyini bildirib. C.Məmmədov Azərbaycan İlahiyyat İnstitutunun yaranma səbəbi, fəaliyyət istiqamətləri, məqsəd və vəzifələri, hədəfləri haqqında məlumat verib.

İnstitutun ilk tədris ilinə İslamşünaslıq və Dinşünaslıq ixtisasları ilə başladığını bildirən rektor ali tədris müəssisəsində bununla bağlı ərəb dilinin, ərəb ölkələri tarixinin, coğrafiyasının, mədəniyyətinin tədris olunduğunu qeyd edib. Rektor Azərbaycanda ərəb dili üzrə tədrisin təkmilləşdirilməsi, o cümlədən müasir ərəb dilinin tədrisi ilə bağlı bir sıra təkliflər səsləndirib.

Aİİ-nin kafedra müdiri, fəlsəfə üzrə fəlsəfə doktoru İlkin Əlimuradov Beynəlxalq Ərəb Dili Günü ilə bağlı təqdimatla çıxış edib. O, 1973-cü ildə ərəb dilinin BMT Baş Assembleyasında qurumun rəsmi dili elan edilməsi haqqında məlumat verərək, bu təşəbbüsün mədəniyyətlərarası dialoqun möhkəmlənməsinə və dünyanın müxtəlif dillərinin inkişafına yardım etdiyini vurğulayıb.

Fələstin Dövlətinin Azərbaycan Respublikasındakı Səfiri cənab Nasir Əbdül Kərim ərəb dilinin zənginliyi haqqında məlumat verib. O bildirib ki, ərəb dili canlı dillər içərisində ən uzunömürlü, ardıcıl olaraq 15 əsr ərzində davamlı şəkildə işləkliyini qoruyub-saxlayıb. Hazırda bu dili öyrənən şəxs müasir ərəb dilindən istifadə edərək, islamdan əvvəlki dövrə aid olan mətnləri oxuya bilər.

İran İslam Respublikasının Azərbaycandakı Səfirliyinin Mədəniyyət Mərkəzinin direktoru Əsgər Farsi ərəb dilinin məziyyətlərindən danışaraq, müsəlman ölkələri arasında vaxtilə iqtisadi-mədəni körpü yaradan bu dilin vahid İslam mədəniyyətinin təşəkkülündəki rolu haqqında məruzə edib.

Azərbaycan Dillər Universitetinin baş müəllimi Ülviyyə Hüseynova qeyd edib ki, ərəb dili beynəlxalq sənədlərin qeydə alındığı rəsmi dil kimi, BMT dillərinə əlavə edildikdən sonra, onun öyrənilməsinə tələbat artıb. Bu dilə artan maraq ərəb dünyası və ərəb dili mütəxəssisləri və müəllimlərinin üzərinə böyük məsuliyyət, qarşılarına isə çətin vəzifə qoyur: dilin özünü asanlaşdırmaq, onu müasir dövrün tələblərinə uyğunlaşdırmaq, qarşılaşdığı çətinlikləri aradan qaldırmaq üçün münasib vasitələrin hazırlanmasını təşkil etmək.

Konfrans Bakı Dövlət Universitetinin Ərəb filologiyası kafedrasının professoru, Azərbaycan Milli Elmlər Akademiyası Nizami Gəncəvi adına Milli Azərbaycan Ədəbiyyatı Muzeyinin Ədəbi mərasimlər və nəşrlər şöbəsinin müdiri, filologiya elmləri doktoru, professor Aida Qasımovanın “Ələsgər Məmmədovun dərslikləri və Azərbaycanda ərəb dilinin tədris problemləri BDU-nun Şərqşünaslıq fakültəsinin timsalında”; AMEA Nizami Gəncəvi adına Ədəbiyyat İnstitutu Qədim dövr Azərbaycan ədəbiyyatı şöbəsinin müdiri, fil.e.d., professor İmamverdi Həmidovun “Qurani-Kərimdə bədii ifadə vasitələrinin işlədilməsi xüsusiyyətləri”; AMEA akad. Ziya Bünyadov adına Şərqşünaslıq İnstitutunun Şərq-Qərb şöbəsinin müdiri, dosent Məmmədəli Babaşlının “Qloballaşan dünyada ərəb dilinin artan rolu və potensial imkanları”; AMEA Z.Bünyadov adına Şərqşünaslıq İnstitutu Din və ictimai fikir tarixi şöbəsinin doktorantı Elnur Mustafayev “Quranın ərəb dilinin inkişafında oynadığı rol”; AMEA Nizami Gəncəvi adına Azərbaycan Milli Ədəbiyyat Muzeyinin elmi işçisi Natavan Bağırova “Ədi ibn Zeyd ərəb saray ədəbiyyatının ilkin nümayəndələrindən biri kimi”; Sumqayıt Dövlət Universiteti Tarix və Coğrafiya fakültəsinin IV kurs tələbəsi Kənan Şahbazlı “Azərbaycan və ərəb ölkələri arasında mədəniyyətlərarası əlaqələrin dünəni və bugünü” mövzusunda məruzələrlə davam edib.

Tədbirin bədii hissəsində Aİİ-nin tələbələri Mirzəzadə Mirzəli, İsmayılova Zeynəb, İskəndərov İskəndər, Rəcəbov Elvin və Qəribli Davud ərəb dilində şeir və mahnılar səsləndiriblər.

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Din.Az - yaradandan yaradılana...