Uca Allah Buyurur:

Bəndəmizə (Muhəmmədə) hissə-hissə göndərdiyimizdən şübhəniz varsa, Allah ilə aranıza qoyduğunuz ulu adamlarınıza da yalvararaq ondakına bənzər bir surə gətirin! İddianızda haqlısınızsa, edərsiniz!

Bəqərə surəsi, 23

İlahiyyat İnstitutunda YAP-ın ilk özək təşkilatı yaradıldı

“Etimadı doğrultmaq üçün Aİİ heyəti olaraq var gücümüzlə çalışırıq.”

Azərbaycan İlahiyyat İnstitutunda (Aİİ) Yeni Azərbaycan Partiyasının (YAP) ilk özək təşkilatının yaradılması ilə bağlı iclas keçirilib.

Din.az bildirir ki, İnstitutun mətbuat xidmətindən Publika.az-a verilən məlumata görə, tədbirdə YAP-ın Yasamal Rayon Təşkilatının sədri Tağı Əhmədov, Aİİ-nin rektoru Ceyhun Məmmədov, İnstitutun partiyaya üzvlük üçün müraciət edən müəllim və işçi heyəti iştirak edib.

Aİİ rektoru C.Məmmədov bütün sahələrdə olduğu kimi, ölkəmizdə təhsilə, mədəniyyətə, milli-mənəvi dəyərlərin qorunmasına xüsusi diqqət yetirildiyini qeyd edib. Rektor Ümummilli Lider Heydər Əliyevin əsasını qoyduğu və Azərbaycan Respublikasının Prezidenti cənab İlham Əliyev tərəfindən qətiyyətlə davam etdirilən dövlət-din siyasətinin uğurlarından danışıb. Ölkə Prezidentinin Sərəncamı ilə Aİİ-nin yaradılmasını bu istiqamətdə atılmış vacib addımlardan biri olduğunu nəzərə çatdıran İnstitut rəhbəri bu ali təhsil müəssisəsinin dövlətin xüsusi diqqət və qayğısı ilə tam əhatə olunduğunu bildirib. C.Məmmədov onu da vurğulayıb ki, hər birimiz özümüzü dövlətin əsgəri hesab edirik və göstərilmiş etimadı doğrultmaq üçün Aİİ heyəti olaraq var gücümüzlə çalışırıq.

İclasda çıxış edən YAP Yasamal Rayon Təşkilatının sədri Tağı Əhmədov partiyanın yaranma tarixindən, təşkilatın qurucusu Ulu Öndər Heydər Əliyevin Azərbaycan tarixindəki misilsiz xidmətlərindən, Prezident İlham Əliyevin rəhbərliyi ilə partiyanın bu gün gördüyü işlərdən, YAP-ın Azərbaycan dövlətçiliyinin inkişafına verdiyi töhfələrdən danışıb. Tağı Əhmədov Azərbaycan İlahiyyat İnstitutunda YAP-ın ilk partiya təşkilatının yaradılması münasibətilə Aİİ kollektivini təbrik edərək, hər bir üzvə dövlət quruculuğunda, Azərbaycan naminə fəaliyyətlərində uğurlar diləyib.

İclasda Aİİ-nin Yeni Azərbaycan Partiyasının özək təşkilatının İdarə Heyətinin üzvləri müəyyənləşib və sədr seçilib.

 

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Din.Az - yaradandan yaradılana...