Uca Allah oruc haqqında buyurub::

“Ey iman gətirənlər! Sizdən əvvəlkilərə fərz qılındığı kimi oruc tutmaq sizə də fərz qılındı ki, bununla qorunasınız”.

“Bəqərə” surəsi, 2/183

““Quran”da erkən nikaha işarə yoxdur” – Dinşünas alim “mollaları” İFŞA ETDİ

Dinşünas alim erkən nikahla bağlı “Quran”a istinad edib buna haqq qazandıranları qınadı.

“Erkən nikah tərəfdarları, yəni azyaşlıların nikaha daxil olmasına haqq qazandırmaq istəyənlər bəraətləri üçün yanlış dini yozumlara üz tuturlar. Spekyulativ fikir ümumilikdə belədir ki, guya dinimiz qızlar üçün konkret yaş dövrünü deyil, həddi-büluğ (“özünü fizioloyi olaraq tanıma”) yaşını əsas götürür. Bu, 12 yaş da ola bilər, 16 yaş da, hətta müəyyən səbəblərdən 18 də”.

Din.az Modern.az-a istinadən bildirir ki, bu fikirləri tanınmış dinşünas alim Nəriman Qasımoğlu bildirib.

O, erkən nikahla bağlı “Quran”a istinad edib buna haqq qazandıranları qınayaraq, həmin iddiaları yalanlayıb:

“”Azyaşlı” – “uşaq” deməkdir. “Uşaq” sözünün OXU-da (“Quran”ı nəzərdə tutur-red.) keçdiyi ayələr var. Həmin ayələrdə insanın yaradılışı və inkişaf dövrləri haqqında məlumat gedir və “uşaq” sözü yetkinlik çağından əvvəlki yaş dövrünü bildirir (22:5; 40:67).

OXU orijinalında “yetkinlik” kimi tərcümə və izah olunan “əşudd” termini keçir və bu, insanın ilk gəncliyi ilə 40 yaşı arasındakı dövrü əhatə edir (6:152; 17:34; 46:15)”.

N.Qasımoğlunun sözlərinə görə, “Quran”dakı Qadınlar surəsinin 6-cı ayəsində gənclərin nikaha daxilolma yaşına işarə kimi səslənən bir hikmət var:

“Ayədə diqqət öncə valideynlərini itirmiş və başqalarının himayəsində qalan yetimlərə, onların miras haqqına yönəldilir. Ayənin həmin hissəsi tərcümədə belə səslənir:

“Nikah çağına çatıncayadək yoxlayın yetimləri. Onlarda bir ağıl-kamal duysanız, qaytarın özlərinə mallarını…”

Burada söhbət valideynlərdən qalma irsin, mal-mülkün yetimlərə qaytarılması zərurətindən gedir və bu zərurət də mülkiyyət haqqına sahiblənib onu idarə etmək üçün onların ağıllı-kamallı olmasını nəzərdə tutur. Gəncin bu keyfiyyətə yiyələnməsi dövrü də onun evlənmə zamanı ilə əlaqələndirilir. Ayənin tərcüməsində “ağıl-kamal” olaraq işlənən söz OXU-nun əslində “ruşd” termini ilə ifadə olunur ki, bu, doğru qərar qəbul etmə, sağlam düşüncə və mühakimə qabiliyyəti anlamını da verir. OXU-dan çıxan nəticə budur ki, nikaha girən gənc – istər oğlan olsun, istər qız – agıllı-kamallı, sağlam düşüncəli, doğru mühakimə qabiliyyətli olmalıdır, azyaşlı bundan sadəcə təbii səbəblərə görə məhrumdur.

Qadınlar surəsinin 25-ci ayəsində qızların ailə qurma yaşına çatanlar haqqında da bir söz keçir: “fətəyə:t”. Bu söz azyaşlılara aid deyil, “gənc qızlar” olaraq tərcümə edilir.

Bəziləri fikirlərini əsaslandırmaq üçün “Talaq” surəsinin (65) 4-cü ayəsinə istinadən iddia edirlər ki, qızların erkən nikahı guya dinimizcə mümkündür. Həmin ayə ərindən ayrılan qadınların boşanma zamanı fiziki durumu haqqındadır: qocalmış, aybaşından kəsilmiş qadınlar; boşanma zamanında aybaşı keçirməmiş olan qadınlar; boşanma zamanında hamilə olan qadınlar. Aybaşı keçirməmişləri azyaşlılar kimi qələmə verən saxta din təəssübkeşləri adi bir həqiqəti görməzlikdən gəlməyə çalışırlar ki, ayədə ümumiyyətlə hələ aybaşı halını yaşamamışlar deyil, boşanma vaxtında bunu müvəqqəti olaraq keçirməmiş qadınlar nəzərdə tutulur”.

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Din.Az - yaradandan yaradılana...